Revelation of John 9
1Quqaumu miqí qímasoofanoo qangiroo moó fannoo narí ufíreena fuaqánau. Fuaqásoofaqa qinée Yoohaneesa qáfaafananoo fásau moó innaarúnaindari maqásaa áqufufa fíndifufanoo moó fannoo maqá ámeemaanai madika miná kooqí kíqa ámufanoo mi-fasaufá faiqíara foora fíndifinoo madika kooqí atuásoofanoo idámuna moómoo firaa idamunará foora minakíqari ururanau. Ururéenoo innaarúna faqa súani afu faqa aiqáma ititáfinau. 3Mi-idamunnánakiqari pándaaqa moómoo qumuréenoo maqásaa áqufiqau. Misá fárukara foora náruaqeera Ánutufa quqánau.4Pándaaqa káaqa ándanda saqári amanee néemarusa márufanoo Ánutufa minára qáoo qímaseenoo faiqí kai náruaqee qufaqa miqímiqau. Sía aiqáma fasiqa anaasee náruaqee qinau. Ánutuna ákara níqinaaqa márinausa sía náruaqee qinau. 5Mi-pandaaqáusara faiqí kuqá náriranara qáoo qinau, káqi aupúrarana kai moodáannai qísauku qúqoonasaa aupúrarana firaaná nímiaqee qinau. Mi-pandaaqáusa nárirafa fáruka naruqoofanóora foora nídafi marinau. 6Moodáannai qísauku qúqoonasaa pándaaqa márinnakamuqoo faiqí ánaasee kúqiranara randáida sía kúqifara aupúree márifanoo kúqirafa adeedíramafinanoo dóo miqóo taikásee fúannoo.
7Mi-pandaaqáusa rákiranaki nímaru qóosausara foora máriqau. Misá níkiaqa kóora áuqira qafeerá foora márinau, misá nóori faiqí nóori fooqáasa máriqau. 8Misá níkiaqa asausí misísausa níkiaqara foora kísaaqandauqa márinau, misá nífai raióonara foora firaa nifai kísaaqa márinau. Misá nímuqusa rafáaqafírafa qáinnara foora márinau, misá níqoosa ufa fannoo faiqí moómoosa sandáafanoo maqá ririqindée qímarinau. 10Misá nímeesa áti fannoo fárukara foora faiqí raqúru nímimarinau. Dóo minánnai faiqí ánaasee moodáannai qísauku qúqoonasaa aupúrarana nímifaranoo. 11Misá saidéenna úriqararafa maqá ámeemaanai madika rakísirafa úriqararafa máridanoo. Yuda máqannaasa ufakíqari moo núqu Heeburu ufakíqari miná áuqu Abadoonnee qímariqau. Kirísa ufakíqari Apoorioonée qímariqau. Mi-auqúna óosana aiqáma ainaina kurídi marínee qímariqau.
12Dóo miqínoo indaarúqaa mándainaina taikánau. Qaaraqánda káqi máridanoo.
13Pándaaqa taikáfufanoo qangiroo moó fannoo narí ufíreena fuaqánau. Fuaqásoofaqa qinée Yoohaneesa íriafananoo kóora áuqira qáinda Ánutuna áfusaa márunakiqari ufa moó qufaqa íriqiafana. Mi-ufáfa kóora áuqira qáinda aannai qaara faqa qaara faqa márunakiqari kambíqafinoo ufíreena fuaqóo qangiroona qímaminoo qinau. Eeufarateesa námmariki qangiroo qaara faqa qaara faqa faiqí kurídi maría qángiroo namusa rumbáqa máriasa idukúnnisaa. 15Idukúnnisoofaqa maqásaaqaraa fasiqa anaasee qaaramoosáa óosuseenoo qaaraqándaki káqi quqásee moodáaki aiqáma naru taikáqau dínni áti firaaqóo káqi quqánau. Ánutufa óoqaindari misá deedaqammá nímufaqa mi-aukuanná mi-quqoona suanínasaa deedaqammá nimiqoosá nári rákira faiqiuqa faqa mi-qangiroo namúsa faiqí ánaasee moómoo uqanna naru taikáqau. 16Mi-qangiroo námu márusa rákira faiqiuqa tu handareta mirióona márufaqa níndafaqiafana (200,000,000). Fífau saqari amaneerá foora moómoo uqanna qáfaqiafana. 17Qinée Yoohaneesa qífu pisipasinóo márufaqa misá qóosauqa faqa misásaa máriasa faqa níndafaqiafana. Qóosasaa máriasa nímuqusa ititárafa akaqáfa taatuqée idáuruara foora máriqau akaqáfa dirindáasi árirafa máriqau akaqáfa tumána árirausa máriqau. Misá qóosauqa níkiqa raióona ákiaqa miqírausa máriqau, misá nóokiqari idáuru̱ námufaqa múna namufaqa nóokiqari úrimarinau. 18Misá qóosauqa nóoki faqa nímeesaki faqa faiqí nárira afeeka máridanoo. Misá nóokiqari idáuru̱ námufaqa idámuna námufaqa maa-maqána afaaqasása máriasakiqari faiqí ánaasee moómoo uqanna nárutaikanau. Mi-qoosáusa nímeesa sakániara foora faiqí ukaqánnimidanoo faiqí aupúrarana firaaná máraidaqa.
20Mi-narimaru ainaináusa maqásaaqaraa fasiqa anaasee moómoo náru taikásoofaqa káqi máriasa miná qáfamasee sía rufíeeqa sía nári mandáinaina minníseeqa Ánutu finnai ubeekéeqa. Káqi maqéeidaqa. Misá káqi kai áfaannauqara innaaru qímariqau. Misá kóorannai siruáannai booróosannai óoninnai saqárinnai Ánutunara foora sía faiqí qáfeemaria ainainna sía ufa írimaria ainainna sía nímaria ainaina, nísaukukoo áuqusaidaqa minára innaaru qímariqau. 21Mi-kaqimaria fasiqa anaaseesá sía narí ári narí árirana minníseeqa, sía áukainaina minníseeqa, sía faiqí ánaasee qúmmuarirana minníseeqa, sía aináina qúmuarirana minníseeqa káqi kai máridanoo.
Copyright information for
BJR